დაავადებათა კონტროლისა და საზოგადოებრივი ჯანდაცვის ეროვნული ცენტრის ხელმძღვანელმა, ამირან გამყრელიძემ უწყებათაშორისი საკოორდინაციო საბჭოს სხდომის შემდეგ განაცხადა, რომ საქართველოში 25 ათასი დოზა გრიპის საწინააღმდეგო ვაქცინა შემოვიდა.
გამყრელიძე ასახელებს ადამიანების 7 კატეგორიას, რომლებიც პირველ ეტაპზე აიცრებიან.
„პირველ ეტაპზე, 25 ათასი დოზა გამოყენებული იქნება ყველაზე უფრო მაღალი რისკჯგუფებისთვის და პოლიკლინიკებში აიცრებიან ყველაზე უფრო მაღალი რისკჯგუფები. ესენი არიან ორსულები, მოხუცთა სახლების ბინადრები, ბავშვთა სახლების ბინადრები, ბაღების პედაგოგები და მომვლელი პერსონალი, შიდსიანი ავადმყოფები, რომლებიც იმყოფებიან მკურნალობაზე, ასევე ჰეპატიტიანი ავადმყოფები, ვინც მკურნალობს და დიალიზით ავადმყოფები. სანამ მეორე დიდი პარტია შემოვა, აიცრებიან ეს ჯგუფები. 23 ოქტომბრიდან აიცრებიან დანარჩენი დიდი რისკჯგუფები. ესენი არიან სამედიცინო პერსონალი, დიაბეტიანი ავადმყოფები, ასევე სხვა ქრონიკული დაავადებების მქონეები, რესპირაციული დაავადებები, ასთმა, 65 წელს ზემოთ თანმხლები დაავადებები ვისაც აქვს, ასევე გულსისხლძარღვთა დაავადებები ვისაც აქვს 45 წელს ზემოთ“, - აცხადებს ამირან გამყრელიძე.
