დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, მას შემდეგ, რაც კორონავირუსის ვაქცინა დამტკიცდება, საქართველო 600-700 ათას დოზას მიიღებს.
„აქტიური მუშაობა მიმდინარეობს კორონავირუსის ვაქცინის პლატფორმასთან, რომელსაც კოვაქს პლატფორმას ეძახიან. იცით, რომ საქართველოს ოფიციალური განაცხადი აქვს გაკეთებული. მესამე ფაზის კვლევები მთავრდება, როდესაც 4-5 ვაქცინიდან ერთ-ერთი დამტკიცდება სხვადასხვა მარეგულირებელი ორგანოს, მათ შორის ჯანმრთელობის მსოფლიო ორგანიზაციის, ევროპის წამლის სააგენტოს და ამერიკის წამლის სააგენტოს მიერ, საქართველო თანდათანობით მიიღებს დაახლოებით 600-700 ათას დოზას. ეს ალბათ, იქნება წლის ბოლოს ან მომავალ წელს, როდესაც კორონავირუსზე ვაქცინაცია დაიწყება მთელ მსოფლიოში“, - განაცხადა ამირან გამყრელიძემ.
