1986 წლის 26 აპრილს, 01:23:47 საათზე, უკრაინის ტერიტორიაზე მდებარე ჩერნობილის ატომური ელექტროსადგურის მეოთხე ბლოკზე ავარია მოხდა. ეს იყო ბირთვულ მოვლენათა საერთაშორისო შკალით მეშვიდე დონის ერთადერთი შემთხვევა ისტორიაში.
ბირთვული აფეთქების შედეგად რეაქტორი მთლიანად დაინგრა, რამაც მისი მიმდებარე ტერიტორიის რადიოაქტიური დაბინძურება გამოიწვია. ის შეფასებულია, როგორც უდიდესი ავარია ატომური ენერგეტიკის ისტორიაში, როგორც დაღუპულთა და მისგან დაშავებულ ადამიანთა რაოდენობით, ისე ეკოლოგიური დაბინძურებითა და ეკონომიკური ზიანით.
უკრაინაში ომის დროს რუსმა ჯარისკაცებმა მალევე დაიკავეს ჩერნობილის ატომური ელექტროსადგური, თუმცა ჯარისკაცების უმეტესობა რადიაციით მოიწამლა.
კერძოდ, რუსმა ჯარისკაცებმა ჩერნობილის აკრძალულ ზონაში მდებარე წითელ ტყეში რადიოაქტიური მტვერი შეისუნთქეს. ამ ადგილს ასე მოიხსენიებენ, რადგან 1986 წლის 26 აპრილს მომხდარი კატასტროფის შემდეგ, იქ განლაგებულმა ფიჭვის ხეებმა რადიაცია შთანთქა და მოწითალო-მოყავისფრო შეფერილობა მიიღო.
რუსი ჯარისკაცები წითელ ტყეში თხრილების აკეთებდნენ, რა დროსაც მათ ორგანიზმში მიწიდან გამოთავისუფლებული უკიდურესად საშიში რადიოაქტიური ნივთიერებები მოხვდა.
აღსანიშნავია, რომ ატომური სადგურის პერსონალი მტერს მოსალოდნელი საფრთხის შესახებ აფრთხილებდა, თუმცა, როგორც აღმოჩნდა, რუსმა ჯარისკაცებმა სიტუაცია სათანადოდ ვერ შეაფასეს.
