უკრაინის პრეზიდენტის ადმინისტრაციის მრჩეველი, ალექსეი არესტოვიჩი აცხადებს, რომ რუსული გემი, რომელსაც გუშინ უკრაინამ ცეცხლი გაუხსნა ჩაიძირა.
„სადაა ‘მოსკვა’ ? ჩაიძირა“, – წერს არესტოვიჩი ტვიტერზე.
ინფორმაცია, რომ კრეისერი იწვოდა, 13 აპრილს რამდენიმე უკრაინელმა მაღალჩინოსანმა გაავრცელა.
ოდესის ოლქის გუბერნატორმა, მაქსიმ მარჩენკომ განაცხადა, უკრაინელმა ჯარისკაცებმა რუსულ სარაკეტო გემს ხომალდსაწინააღმდეგო რაკეტები “ნეპტუნი” ესროლეს და ხანძარიც სწორედ ამან გამოიწვია.
რუსეთის თავდაცვის სამინისტრომ დაადასტურა, რომ რუსეთის საზღვაო ძალების შავი ზღვის ფლოტის ხომალდზე, სარაკეტო კრეისერ მოსკვაზე ხანძარი გაჩნდა.
უწყების განცხადებით, საბრძოლო ხომალდ მოსკვაზე ხანძარი საბრძოლო მასალის აფეთქებამ გამოიწვია.
„ხომალდი სერიოზულად დააზიანდა, ეკიპაჟი სრულიად ევაკიურებულია. მიზეზები დგინდება“, – წერს რუსული სამთავრობო გამოცემა რია ნოვოსტი თავდაცვის სამინისტროს წყაროზე დაყრდნობით.
